नेपाल जनजाति समाज म्युनिखले नेपालीहरुको बिशेष पर्व ल्होसार बिभिन्न सांस्कृतिक कार्यक्रमका साथ भब्य रुपमा मनाएको छ ।
सांस्कृतिक कार्यक्रममा नेपालको भेषभुषा र संस्कृति झल्किने खालका नृत्यहरु र गीतहरु प्रस्तुत गरिएको थियो । करीब एक सय २० जना नेपालीहरुको उपस्थीती रहेको सो कार्यक्रमको मुख्य आकर्षण चर्चित गाएक यश कुमारको प्रस्तुती रहेको थियो ।
युरोप भ्रमणमा रहेका गायक यश कुमारले आफ्ना पुराना र नयाँ गीतहरु प्रस्तुत गर्दा सम्पूर्ण दर्शकहरु तालमा ताल मिलाएर नाचेका थिए । करीब एक महिना अझै युरोपका अन्य देशका नेपाली दर्शकहरुलाई नचाउन म्युनिख आइपुगेका गाएकले युरोपका नेपाली दर्शक माझ गाउदा निकै आनन्द महसुश हुने बताए । यहाँका नेपालीहरुको खुबी नै गीतलाई सुन्ने धैर्य र त्यसलाई महसुस गर्न सक्ने क्षमता नै हो – उनले भने ।
संस्थाका अध्यक्ष जयन गुरुङको अध्यक्षता भएको सो कार्यक्रममा सेर्पा समाज हम्बर्गका महासचिब दावा शेर्पाले नेपाली भाषा र संस्कृतिको संरक्षणमा यस्ता कार्यक्रम ले महत्वपूर्ण भूमिका खेल्ने बताए । उनले नेपालमा नयाँ बन्न लागेको संबिधानमा कुनै जात जातीलाई मात्र नभएर सबै जात, जाती र भाषा संस्कृतिलाई उत्तिकै महत्व दिनुपर्ने बताए ।
आदिवासी समाज अष्ट्रियाका सचिब बुद्धी तमाङले नेपाल र नेपालीको हितको लागि सबै जात जातिले हातेमालो गर्नु पर्ने बताए । जनजाती समाजका सल्लहकार सन्चमान जभेगुले जातिएताको आधारमा कसैलाई पनि भेद भाव गर्न नहुने बताए । कार्यक्रममा संस्थाका उपाध्यक्ष शेखराज सुनवार, तमु समाज हम्बर्गका अध्यक्ष बिजय गुरुङ लगायतका बक्ताहरुले पनि आफ्नो मन्तब्य ब्यक्त गरेका थिए ।
