काठमाडौं, माघ १२ – स्वास्थ्यमन्त्री राजेन्द्र महतो नेतृत्वको सदभावना पार्टी फेरि फूटेको छ । सभाषद रामनरेश राय र गौरी महतो कोईरीले सद्भावना पार्टीबाट अलग भएर राष्ट्रिय सदभावना पार्टी गठन गर्नुभएको छ ।
महतोले पार्टीमा परिवारवाद लादेको र पार्टीलाई निजी सम्पत्ति जस्तो बनाएकोले नयाँ पार्टी गठन गरेको सभाषद गौरी महतो कोईरीले जानकारी दिनुभयो । नयाँ पार्टी गठन भएको जानकारी गराउँदै राय र महतोले सभामुख सुवासचन्द्र नेम्वाङसित पार्टीलाई कार्यालय उपलब्ध गराईदिन आग्रह गर्नुभएको छ ।
संविधान सभामा ९ सदस्य भएको महतो नेतृत्वको पार्टीबाट अलग भएर यसअघि चार जना सभाषद सहित अनिल झाले नयाँ पार्टी गठन गर्नुभएको थियो । मन्त्री महतो भने अहिले भारत भ्रमणमा हुनुहुन्छ ।
