गोरखा, फागुन ८ । उत्तरी गोरखाको विकट उहिया गाविसको एक घरमा गएराति आगलागी हुँदा किरियापुत्री कुर्न बसेका एक दर्जनभन्दा बढी स्थानीय सर्वसाधारण घाइते भएका छन् । उहिया-१ खोर्लाका सुवानसिंह गुरुङको घरमा आगलागी हुँदा ती मानिसहरु घाइते भएको प्रहरीले जनाएको छ । जिल्ला प्रहरी कार्यालय गोरखाले दिएको जानकारी अनुसार आगलागीमा स्थानीय कमल गुरुङ, अरुण गुरुङ, टेकबहादुर गुरुङ, वीरबहादुर गुरुङ, शर्मिला गुरुङ र सुनिता गुरुङलगायत १३ जना गम्भीर घाइते भएका हुन् । गोरखा प्रहरीका प्रमुख प्रहरी नायव उपरीक्षक वसन्त कुँवरका अनुसार टुकीमा मट्टतिेल थप्ने क्रममा राति करिब सवा नौ बजेको समयमा आगलागी भएको थियो । आगलागीका कारण सुवानसिंहको घर जलेर पूरै नष्ट भएको छ । आगलागीका कारण भएको भौतिक क्षतिको यकिन विवरण आइनसकेको प्रहरीले बताएको छ । कुँवरले घाइतेमध्ये गम्भीर अवस्थाका बिरामीलाई स्थानीय स्वास्थ्य संस्थामा प्राथमिक उपचार गरी थप उपचारका लागि हेलिकोप्टर मार्फत काठमाडौँ पठाइएको जानकारी दिनुभयो । घटनास्थल पुग्न जिल्ला सदरमुकामबाट झण्डै एक दिन पैदल हिँड्नु पर्छ ।