अस्ट्रेलिया, जनवरी २६ – स्थानीय आदिवासीको आक्रमणबाट अस्ट्रेलियाका प्रधानमन्त्री जुलिया गिलार्ड र विपक्षी दलका नेता टोनी एबोट मुस्किलले बाँच्नुभएको छ । अस्ट्रेलियाको राष्ट्रिय दिवस मनाउन एक रेस्टुरेन्टमा पुगेका प्रधानमन्त्री गिलार्डलाई स्थानीय आदिवासीहरुको आक्रमणबाट प्रहरीले उद्दार गरेको बिबिसीले जनाएको छ ।
रेस्टुरेन्ट भित्र रहेका प्रधानमन्त्रीलाई झण्डै दुई सय आदिवासीहरुले घेरेका थिए । सन् १७८८ मा अंग्रेजहरु अस्ट्रेलिया पुगेको अवसरमा अस्ट्रेलियामा राष्ट्रिय दिवस मनाइन्छ । तर आदिवासीहरुले भने यो दिवसलाई आफु विरुद्धको आक्रमणका रुपमा हेर्ने गरेको अन्तर्राष्ट्रिय सञ्चार माध्यमहरुले जनाएका छन् । आदिवासीहरु अंग्रेज बिरोधी हुन् ।
२० मिनेटसम्म प्रधानमन्त्री गिलार्ड सहितका नेता आदिवासीको घेराउमा परेपछि बल्ल प्रहरी घटनास्थलमा आएर उद्दार गरेको थियो । अस्ट्रेलियाका आदिवासीहरु समान अधिकारका लागि भन्दै लामो समय देखि आन्दोलन गरिरहेको र विपक्षी दलका नेता एबोटले संविधानमा आदिवासीहरुलाई मान्यता दिएकोले आन्दोलन रोक्न आग्रह गरेपछि उनीहरु आक्रोशित बनेको बिबिसीले जनाएको छ । यि आदिवासीहरु भूमि अधिकार माग्दै आन्दोलनमा छन् ।
आदिवासी समर्थकहरु आफ्नो संस्था स्थापानको ४० औँ वर्षगाँठ मनाउन त्यहाँ भेला भएका थिए । प्रहरीले प्रधानमन्त्रीलाई कठालोमा समातेर गाडीमा हालेको र त्यसक्रममा उहाँको जुत्ता समेत छुटेको बिबिसीले लेखेको छ । प्रधानमन्त्रीको गाडी गुड्दा समेत आदिवासीहरुले उहाँलाई लखेट्न छोडेनन् । जब गाडीले रफ्तार लियो बल्ल उनीहरु फर्केका थिए ।
स्रोत: एजेन्सीहरु
